曼德拉（Nelson Rolihlahla Mandela，1918年7月18號—）係喺第一次多種族、全民民主選舉產生嘅南非總統。1994年4月27號當選，做到1999年。
曼德拉喺南非出世。做總統前，曼德拉係反種族隔離活躍份子，領導非洲人國民議會（ANC），轉入地下活動，武裝對抗政府，1962年，被捕，以「煽動罪」同「非法出國」被判 5 年。1964年加控「陰謀暴力推翻政府」改判無期徒刑。
畀人困咗 27 年，大部份時間喺羅賓島（Robben Island）嘅一間牢房，曼德拉成為家喻戶曉嘅人物，國際之間好支持佢嘅反種族隔離鬥爭，成為一個自由同平等嘅象徵，媲美甘地（同甘地唔同，曼德拉曾經主張用暴力）。但係，認同種族隔離嘅政府同國家話曼德拉係共產黨人同恐怖分子，支持種族隔離嘅人加上好多南非白人都好鬼憎佢。
1990年出監之後，佢改用和解政策，通過談判，最後帶領南非變成一個多種族嘅民主國家。由於種族隔離制度結束，好多人讚佢，甚至南非白人同以前嘅對手。
曼德拉，喺過去四十年嚟，已經得到超過一百個獎，最值得注意嘅有諾貝爾和平獎。而家，佢繼續發表自己嘅意見同埋論題。