九廣西鐵（簡稱西鐵），係香港九廣鐵路公司營運嘅三條本地客運鐵路之一。從深水埗區嘅南昌站，經過新界南，連接新界西北嘅元朗以及屯門，全長30.5公里。截至2006年，共有9個車站，當中有6個轉車站。除咗荃灣西站完全起喺地底之外，其他車站都起喺地面或高架橋之上。全線嘅客運服務都使用日製電動列車九鐵SP1900型電車以及加拿大嘅Seltrac訊號系統，目前全組車隊共有22列，每列7卡，共154卡電動列車車廂。西鐵喺路線圖中以粉紅色代表。