燈係指用來照嘢嘅架生。家下燈通常用電來發光，所以呢類燈又叫電燈。而古代嘅中國就係靠燒燈油之類嘅燃料，用一條布線捲成嘅燈芯去吸取燈油嘅原理，再用火點著條燈芯嚟照明，稱為油燈。

燈嘅小知識

世界上第一盞照明嘅氣燈係由英國人馬特克喺1792年發明。
1808年，英國嘅科學家大衛發明咗孤光燈；佢嘅原理係用兩支中間有少少距離嘅炭枝，通電之後炭枝中嘅空間就會因為有電流感應而發出黃色燈光。期後仲發現咗用白金通電可以發出白色光嘅原理。
1845年，美國人史達喺真空嘅玻璃樽入面成功咁令白金燃燒發光，但係因為成本太貴而冇廣泛咁採用。
1878年，美國人史旺用紙造出燃燒嘅細絲放入真空玻璃樽入面發光，但係維持得唔持久。
1879年，美國偉大發明家愛迪生利用經過炭處理嘅綿線放喺真空嘅玻璃樽入面通電燃燒，成功咁做出可以維持四十個鐘頭以上嘅電燈膽，之後再用經過炭粒加工嘅竹造燈絲，成功咁令到燈膽可以維持一千二百個鐘以上；自此電燈就被廣泛咁採用。
今日嘅電燈膽燈絲係用鎢嚟造，而原本真空嘅膽入面就加咗氬氣，令到盞燈膽更加持久耐用。