公曆，即係世界上大多數地方用嘅曆法，而家用緊嘅公曆係格里曆（Gregorian calendar），又譯額我略曆、格列高利曆，係由意大利醫生兼哲學家 Aloysius Lilius 改革儒略曆整出嚟，由教宗格列高利十三世喺1582年歐洲頒佈推行。

有乜特別
格里曆同儒略曆一樣，都係每四年喺二月底加一個閏日，不過，格里曆特別規定，所有嘅世紀年（即嗰年有兩個零喺尾，1800年、1900年咁啦）都冇閏日，不過，如果嗰年可以俾 400 整除，就有閏日，好似2000年咁，2000 可以俾 400 整除，所以2000年就有2月29號。
每 400 年，額我略曆就只得 97 個閏年，比儒略曆少 3 個。額我略曆嘅年平均長度係 365.2425 日，接近平均回歸年嘅 365.24219 日，即係約每 3300 年先有一日誤差，亦接近春分點回歸年嘅 365.24237 日，即係大約每 8000 年誤差一日。而儒略曆嘅曆年係 365.25 日，約每 128 年就多咗一日。到1582年時，儒略曆嘅春分日（3月21號）同地球公轉到春分點嘅實際時間已經相差咗 10 日。
格列高利曆開始行嗰陣，同時規定，原先儒略曆1582年10月4號星期四嘅遞日係格列高利曆1582年10月15號星期五，即有11日唔見咗，而原先星期嘅週期就唔改。格列高利曆嘅紀年沿用儒略曆，係傳統嘅耶穌出世嗰年開始，有叫「公元」或「西元」。